Zbuloni Japoninë përmes arkitekturës së saj dhe marrëdhënies së veçantë mes hapësirave, kulturës dhe jetës së përditshme. “Mjedisi i Ndërtuar – Një Udhëzues Alternativ për Japoninë” sjell një këndvështrim ndryshe mbi Japoninë përmes ndërtesave dhe hapësirave që pasqyrojnë mënyrën e jetesës dhe kulturën japoneze. Ekspozita prezantohet në bashkëpunim me Japan Foundation dhe COD.

Një përvojë kushtuar kuzhinës japoneze do t’u ofrojë pjesëmarrësve mundësinë të zbulojnë nga afër disa prej elementeve që karakterizojnë traditën e saj gastronomike, përmes një demonstrimi të përgatitjes dhe një degustimi të specialiteteve të përzgjedhura. Menuja përfshin Temari Sushi, Uramaki, mini-sanduiç me Chicken Katsu dhe Fruit Daifuku. Pjesëmarrja është e kufizuar në 60 persona dhe bëhet vetëm me regjistrim.

Një ditë e dedikuar kinemasë bashkëkohore japoneze sjell në ekran dy produksione të vlerësuara, “The Hotel of My Dream” (2024) dhe “Sunset Sunrise” (2025). Përmes këtyre dy filmave, publiku do të ketë mundësinë të njohë histori dhe personazhe që pasqyrojnë aspekte të shoqërisë, kulturës dhe jetës së Japonisë së sotme.

Një ditë e dedikuar arteve marciale japoneze sjell në tatami Kupën e Ambasadorit në Xhudo dhe Karate, duke mbledhur sportistë në një aktivitet që ndërthur garën me vlerat e disiplinës, respektit, këmbënguljes dhe frymës sportive. Organizuar në bashkëpunim me Federatën Shqiptare të Karatesë dhe Federatën Shqiptare të Xhudos, ky aktivitet i ofron publikut mundësinë të ndjekë nga afër traditën dhe filozofinë që karakterizojnë artet marciale japoneze, si dhe të përjetojë energjinë dhe pasionin e sportistëve në garë.